貢茶 (匯景花園) (Closed)

自從係台灣飲過手作仙草凍之後就念念不忘，返港後飲過幾間一係過甜、一係仙草碎濕濕，最對辦既一定係貢茶。 可惜貢茶分店雖多，每次想飲時總會發現地點陰差陽錯地遠離我經常活動既區域。今晚仙草癮起，打算求其係藍田搵間台式飲品店試下，點知驚喜地發現匯景商場有貢茶新分店！鋪位細細同時位於該層最入既位置，到達時唔太多人，所以不假思索地落單後近乎廿秒內就有得飲喇。鮮奶仙草凍 ($23)簡簡單單，滿滿既仙草凍同鮮奶裝滿一杯就製成。 仙草凍帶獨有既仙草幽香，甜度岩岩好，大大塊滑嘟嘟連埋鮮奶一齊飲，香滑度更上另一個層次。 由於鮮奶飲品唔可以選擇甜度同冰度，亦唔會點加冰，如果職員貪快就咁將鮮奶放出黎唔雪住，好多時都會飲到唔夠凍既出品。 好欣賞呢個分店既鮮奶仙草凍唔洗落冰都夠哂凍，好有水準。可能裝得比較滿，飲飲下好論盡咁飲到成身都係，店員好窩心咁提醒我可以狂拎台面既紙巾，做到台灣個種人情味，抵讚。