Fifty Fifty (Closed)

之前媽咪推介呢一間，話係長沙灣好受歡迎，所以趁放假前嚟試一試。佢都幾近地鐵站，唔難搵。我地好早六點去到，有幾枱食緊，座位主要係木櫈木枱，正正常常闊度，無話特別舒唔舒服。餐廳係掃qr code睇餐牌，再叫人落單，所以都幾環保，又唔使掂啲長期唔知幾多人摸過嘅紙。每個set包湯、是日甜品同$20嘢飲，即係最普通個啲檸茶奶茶，超過就補差額。甘荀湯我覺得就麻麻地，好淡口，聞唔到咩甘荀味，同埋食得出加咗粉嚟煮，無跟餐包怪怪的。大啡菇意大利飯就幾好食，個汁好濃，啲飯煮到一粒粒被醬汁包圍好彈牙有口感，係有水準之作。意大利雲吞亦出奇地好味，每一隻嘅size都差不多，咬下去聞到好香嘅黑松露味，伴上調味得剛剛好嘅白汁，連埋側邊啲小菇一齊食，令人好滿足。甜品係芝士蛋糕，就正正常常無乜特別。總括而言，百幾蚊一個set，好經濟實惠，主食質量有水準，可以返食。