群記牛肉圓豬手

Open Now

Now Closed

群記豬手，粉嶺名物，區內無人不知。要食到呢款夢幻豬手，都要講啲緣份。大時大節，東主有喜，出門旅行一律唔開的。午飯時間等到喊，針插唔入一位難求。避開人潮晏啲嚟豬手好快賣晒，所以要專程揀個王道吉日，較啱時間先好嚟朝聖。 是日打電話嚟確認有開，午市剛過，入嚟碰運氣，行正好運，全院滿座之下，唔使等有張三人枱。老店自有人情味，熟客都會體諒老闆，自動自覺食完盡快騰空坐位比舖頭做生意，唔會吹水霸枱磨爛蓆。我哋都識做，坐低即嗌嘢。 懷舊味道，瀰漫整個空間，而家已幾乎絕跡，連酒樓街市都棄用嘅花碼字，竟然重現群記嘅價目表，老店守住嘅，除咗味道，仲有中國市井文化。舊舖自然有舊裝修，店內陳設可謂簡陋，而且燈光昏暗，得幾枝光管照明，但有好嘢食，客人又點會介意呢啲細節呢？ 自家製辣椒油(免費，無限添食)肯定係鎮店之寶，有傳統潮州辣椒油嘅香辣，入口剌激，嗆喉而不攻鼻，不少客人都為佢而嚟。所以店家每位客人都奉上一小碟，如果唔夠食，老闆亦大方任食。但引述成日亂噏嘢嘅成龍大哥一句金句。佢曾經同成家班語重深長咁講:「食嘢，更貴都唔緊要，最緊要食得晒，食唔晒，就係嘥，會折福嘅。