Coffeeholic (Closed)

經開蘇杭街，搵食就去咗呢間coffee shop。鋪仔細細，得三張枱，因為疫情關係，仲要限制兩人一枱，都幾慘，加埋都係做得個六個客max。我地嗌左兩個lunch set。堂食有七五折，跟餐野飲減$21。落完單好快送上兩杯仔餐湯，今日係南瓜湯，好香既南瓜湯，質地係稠身個隻，幾好味，不過好細杯，兩三淡飲晒。D- 沙律配慢煮雞腿($96)：個雞俾肉係走骨，慢煮係唔同啲，d雞肉一啲都唔鞋。沙律除咗沙律菜之外，仲有啲焗香左嘅腰果（幾香脆）、蘋果乾（好乾，好柴）、同一隻蛋（蛋唔係流心，只可以話係軟心，應該係雪櫃啱啱拎出嚟，凍凍地）。巴馬臣芝士，其實係灑左啲芝士粉係上面。自家蜂蜜芥末醬，完全食唔出好似係普通醋汁。可能對於女仔來講其實係夠，不過對男士來講，就會細得滯囉。H- 黑松露雜菌意大利飯配大啡菇($104)：分量好似太細，朋友食完覺得唔飽。呢個意大利飯唔會煮到淋晒，總算有啲嚼頭。黑松露味好出，大啡菇亦都煮得夠晒淋，好味既。Flat white ：好滑。拉花好令，畫左個女仔，好大杯。Americano： 幾好味。背景音樂細細聲，環境靜靜地，感覺幾好。趁依家冇乜人，可以慢慢食，嘆埋杯咖啡。