阿叔泰麵 (西菁街) (Closed)

我好鍾意食泰國嘢，不過就好少食泰國麵，不過朋友強力推介呢間餐廳俾我，咁我就去試吓啦。我哋叫咗個炸蝦餅，一碟有三舊，切開有六件。蝦餅都幾彈牙，同埋食得出材料好足，唔算好多粉，正！朋友話船麵好出名好好食，所以我就叫咗一個牛肉船麵，入面有牛腩、丸、芽菜等等。枱面有一個食船麵嘅簡介，就係要將枱面嘅四樣配料，包括糖、醋、魚露同辣椒一齊放落碗麵度食。呢個食法都幾新鮮，我未加呢四樣配料前先試咗個湯底，都幾濃味，之後加咗呢四樣配料落去係令到個味道更加有提升，真係仲好味左！朋友叫咗個蛋炒咖喱蟹肉飯，佢話呢個好好食。所以我就食咗幾啖，入面蟹肉都幾多，咖喱味唔算好辣，送飯真係一流。我最後叫咗一杯碟豆花芒椰奶香，一放上枱面係紫色嘅一杯野，超級靚！椰香味好香好重，唔算太甜，好飲。