肉餅哥小炒料理 (Closed)

美林冬菇亭翻新左幾年，身為大圍友但一直未去過食野，一於搵日去試下。見openrice評價唔錯，就去左食肉餅哥。平日晚飯時段差唔多坐滿人，望落係冬菇亭最旺既個間。一坐低就feel到好勁既冷氣，上左menu就上左兩碗例湯，味道偏咸。兩個人去食所以叫左個兩人set，一湯兩餸兩飯同兩支可樂，好耐無飲過玻璃瓶裝既可樂啦！首先上左蟲草花花膠雞腳湯，一大碗，裡面料好足，雞腳都有兩隻，味道好濃幾好飲。之後就上左主菜同飯，飯加幾蚊轉左菜飯，幾香。兩款餸揀左京都骨同招牌肉餅。京都骨幾香，肉唔肥唔柴，可惜翻整同放得耐有d un。招牌肉餅係煎肉餅外面裹住咸蛋黃，食落非常香口，而且肉餅用料足，份量亦好多(本來以為只得四塊左右)。總括而言，肉餅哥比我感覺係茶餐廳同大排擋之間，食物似大排擋大份而且好有鑊氣，但環境就有d似茶餐廳但比茶餐廳舒服，食物整體偏咸且濃。btw有朋友話衛生情況麻麻，但當日去到都算乾淨。