第三站

朋友升職諗住食餐好啲嘅，佢又鍾意玩board game，之前都有見過呢間，今次book到位，咁就一於試一試！一去到都好快安排到位比我哋。座位非常闊落，坐得都幾舒服。枱櫈、餐具都算乾淨，仲有獨立包裝濕紙巾，呢啲細心位都幾加分👍🏻之後點餐，我哋叫咗一份煙三文魚野菌忌廉燴闊條麵，一份西班牙煙鴨胸燴飯，加錢叫咗一杯oero奶昔同薄荷朱古力，仲有碟松露薯條。煙三文魚闊條麵忌廉汁唔會過稀，唔會太”漏”。煙三文魚又唔會太咸，成碟份量又多，同朋友都覺得幾好味！至於燴飯都唔差，鴨胸肉切細粒易入口。本身都驚西班牙飯會唔會好硬，但佢硬度適中，d鴨胸肉又好淋，食落唔會咬得好辛苦。兩杯飲品都係食cafe成日會叫，唔會太甜，份量都啱啱好，都係補幾蚊到十幾蚊，算係唔錯。最後美中不足嘅係松露薯條慢咗啲上菜，不過上檯嘅時候熱辣辣啱啱炸好，外脆內軟，松露味唔算太濃，勝在份量好多食到好飽！整體嚟講cp值幾高，環境算靜，大家都唔會玩到好嘈。員工服務態度好，一禁鐘就好快有人嚟。而且最正係仲有唔同款嘅board game玩，食飽仲可以玩陣先走。可惜兩個人唔係玩到好多game，下次可以再約多幾個fd嚟又食又玩！