秋香 (黃金海岸商場) (Closed)

今日入黃金海岸試左一間叫”秋香”既中日fusion菜，呢個日式煲仔飯絕對滿足左我既味蕾。間餐廳空間不大，室內既裝修都算幾有心機，室外都有幾張枱，唔怕熱既朋友都可以坐係出面chill下。本身想試佢地最出名個鹽燒白鱔煲仔飯，不過佢係每日限量發售一個人，我無提早預訂所以就無緣試到。見到個餐牌有個”日本雞肝雞腎地雞釜煲仔飯”，咁特別用雞既內臟去整既煲仔飯，梗係要一試！前菜有櫻花蝦味噌湯同漬物，煲仔飯採用日本產既珍珠米，米粒用日本醬油煮過，粒粒分明，口感煙韌，飯焦食落好香口。飯面有隻生既日本雞蛋，撈埋d料同飯令到d飯濕濕地，唔會好似傳統煲仔飯d飯咁乾。料方面，日本雞肉唔會煮到好乾，食落都好滑身同入味，雞肝同雞腎呢d肉臟平時只會串燒既時候先會食，但原來撈埋落煲仔飯入面好有驚喜，口感比起只有雞肉既煲仔飯黎得有層次！成個煲仔飯令我個味蕾好滿足，不過如果一個人食哂就會太濟，兩個人share會食得舒服d!另外仲嗌左杯士多啤梨洛神乳酪梳打，酸酸甜甜咁幾開胃，唔會甜到好似飲藥水咁，夏天飲都幾正。📍屯門青山公路1號黄金海岸商場地下32號舖位置就腳：🍊🍊🍊餐廳環境：🍊🍊🍊🍊食物味道：🍊🍊🍊🍊🍊整體CP值：🍊🍊🍊🍊