After You Dessert Café (Closed)

呢間泰國過江龍，喺佢一開嘅時候已經俾佢嘅廣告吸引咗，因為我非常之鍾意食鹹蛋菜式，所以我見到佢嘅鹹蛋厚多士就即刻想去食，但係開張嗰陣要排好耐隊，所以我都係決定遲少少先去。今次約到同好一齊去食，我哋就點咗我嘅目的甜品。一試之下，果然非常之啱我口味，鹹甜之間嘅比例捉得非常好，絕對唔會覺得有咸有甜好奇怪。佢仲另外配左甜甜地嘅鹹蛋黃醬，要嚟點多士，真係好一流因為實在太好食，所以我忍唔住再點多另外一款試吓，呢個都係佢哋嘅招牌菜，芒果糯米飯厚多士。可惜，呢個甜品就令我有啲失望，芒果唔夠甜，糯米飯雪糕生果同醬汁嘅比例拎得唔夠好，非常普通，如果以呢個價錢嚟講就絕對唔抵食。