第一郡 (Closed)

以往工作路過深水埗時已經想試這間餐廳，但一直冇機會，今日同友人路經炮台山見到佢開左分店，見到有位就入去試下。我個人好鐘意食撈檬，所以叫左一個扎肉撈檬，而我朋友驚份量唔夠，所以叫左一個三色蛋豬扒飯。個撈檬係好有小店味道，平時自己加落去的酸汁，鋪頭已經一早幫你落左係底，份量岩岩好，個撈檬唔會太乾身或濕身，而伴菜的冬筍絲、甘筍絲配合由青檸汁、魚露製成的酸汁絕對一流。檬粉的麵質唔會太硬或瀮，相當好味，而酸汁亦十分入味，最有驚喜係個扎肉，比起出面餐廳厚身，亦有肥膏係上面，有少少似上海的鎮江肴肉，配合埋酸汁，非常好食。至於我朋友的豬扒飯，佢就話麻麻地，豬扒偏甜同埋有豬腥味。