Minh & Kok (Closed)

晚飯時候一家三口行到太古城foodcourt睇下食乜嘢,見到呢一間越式同泰式都有得食,就試下啦。門口細細,但入到去裏面原來好闊落,仲裝修得幾靚,坐得好舒服,1.5米距離都做得到。跟住,我哋叫咗兩碗越式生牛肉河和一碗鮮蝦扎肉喇沙湯麵。話咁快就送上生牛肉河。我一般食湯麵都會先飲一啖湯,個湯底好有牛肉味,出乎意料之外。雖然個碗唔算好大,但係河粉同牛肉同湯嘅比例啱啱好,唔會覺得"稀nel nel"。要一讚嘅係,芽菜同河粉都應該全部由越南入口,因為我係食到"肥嘟嘟短腳芽菜,同埋食得出俾港式河粉幼細而且幼滑嘅越南河粉,所以要即刻畀個like佢,另外,其中一塊牛肉超大塊,真係好意外!至於喇沙方面,湯底唔算太辣好啱我,面條有彈性,仲有一隻大蝦加三大塊扎肉,真係性價比高。可惜試唔到通菜,由於已經售罄,只好叫個甜品~香芒鴛鴦糯米飯。糯米飯大細啱曬一家三口,作為飯後甜品,就算四個人都好ok。糯米飯係standard嘅溫暖,芒果就有少少酸,整體都合格。