Pizza Baby (Closed)

喺附近做完野，見到呢間pizza baby門面好吸晴，真係好大隻baby坐左喺門口，而全間鋪頭係用左粉紅色做色調，滿足愛自拍嘅少女黎打卡影相。入面裝修都幾溫馨，好似出席緊一個小baby嘅百日宴咁，牆上有好多自已畫嘅圖畫同自拍，感覺親切。Menu好得意，菜式名稱唔係一般普通名，改左d會令人會心一笑嘅菜名。配合埋手繪圖畫同文字，好有心機。值得一提係佢有個一次性嘅圍肩，岩晒食野污糟嘅豬呀～超體貼，又配合餐廳主題，baby都會用口水肩，哈哈忍者滾蛋，個名真係好得意，豬落order時都忍唔住少左。pizza成個賣相俾我地嘅感覺係:大~阪~燒~上面鋪左好多木魚絲，中間有滿滿嘅日式醬汁，傳黎日式小丸子嘅味道。材料方面有椰菜同煙肉，椰菜份量好多，所以pizza唔會覺得漏。餅底方面唔會厚，而且焗到岩岩好，餅邊好香脆。要講下架單車，係切餅用，好可愛。叫左個蜜糖芥末雞翼做餐前小食，賣相好吸引。雞翼炸過，所以食落卜卜脆。有蜜糖味，甜甜地，加埋唔會太辣嘅芥末，非常惹味，係個好好嘅配搭。日出時分係一杯用士多啤梨同熱情果做嘅梳打飲料，甜甜酸酸，好味道又非常解渴。