新蒸武門 (Closed)

上星期喺觀塘放工後食飯 畀我發現到有一間有"屋企飯"感覺嘅餐廳，位於駱駝漆三座1樓嘅新蒸武門，以蒸煮嘅小菜為主， 出街食飯普遍多鹽多油， 但呢間嘅味道絕對健康。好耐冇返過屋企飲湯，所以絕對要喺度品嚐佢嘅燉湯，“椰子雪耳燉雞” 每人一盅，用料豐富，椰子味極香甜，配合雪耳及鮮雞，絕對同阿媽靚湯有得fight。佢哋有多款餸菜選擇，難得有住家菜食， 首先離個濃湯節瓜浸魚滑， 節瓜雲耳配鯪魚肉，用高湯煮成， 又清新又健康， 最後連所有高湯都飲埋， 一啲都唔好嘥。另外豉汁帶子蒸豆腐， 豆腐配想帶子再加埋豆豉一齊蒸， 清得離食到帶子嘅鮮味，而豆腐又滑又好味。最後梗係要試埋佢嘅紅棗杞子荷葉蒸雞，98蚊呢個價錢非常抵食，用荷葉包住鮮雞紅棗杞子粉絲同金菇，保持鮮雞嘅嫩滑，紅棗杞子帶甜味，而粉絲金菇索咗雞汁，非常好味，呢個蒸雞絕對推介。平時少返屋企食住家飯，“新蒸武門”絕對適合無飯煮婦既朋友， 清新健康又好味。