華星客棧 (Closed)

星期日跟兔仔媽媽吃晚飯，選擇到附近且評價不錯的華星客棧。5:45pm 到門口，原來晚市6點先開始，唯有喺門口排住第一位先，之後陸續都有幾個人開始跟住排隊。一行三人叫左5款食物：墨魚子蝦多士 - 多士炸得鬆脆，唔算多油，多士面有原隻蝦而唔係蝦膠，仲連埋蝦尾添，食落彈牙，賣相唔錯！五柳魚塊 - 較失望，外層炸粉太厚，魚塊味道一般，甜酸汁唔係太酸，都OK。芝士焗海蝦伊麵 - 見評語大家都讚口不絕，兔女當然唔會放過啦！一上枱已聞到芝士味，撈起來更加係芝士不絕，真係好食，芝士蝦同蝦多士一樣咁彈牙，兔女食左2碗都唔覺漏。大澳蝦醬蒸黑豚肉 - 黑豚肉入口好滑，但好可惜係D肉癡埋一大舊，毎次食都要夾硬分開D肉！蝦醬味好濃，但唔明點解仲要加豉油？！令到個餸好咸，兔仔要叫多碗白飯先可以KO碟餸！上湯魚肚浸時蔬(生菜) - 上枱見到濃白色上湯，兔仔兔女即時試一啖！冇魚味既？只有菜味，我地都好失望。呢個餸較為清淡，亦都可以作為咁多濃味餸之間既間場。