翠苑甜品專家 (北角道)

Open Now

Now Closed

我同朋友七個人入去，場內得兩枱客，四五張吉枱。因為無大枱，所以問呀姐可唔可以拼一拼兩場細枱，講明食完會移返原位，但呀姐就立刻黑面，死都要我地七個人坐一張直徑一米既細枱，當下真係好想佢示範比我睇。七個人，我地疊羅漢呀？唔係好明點解場內四五張吉枱既情況下，係都要逼我地一班人坐，又唔比拼枱。如果唔係有外地朋友係度，真係想講句粗口走人。因為佢根本無當我地係客。同佢嘈多兩句，我地就唔理佢自己移枱。之後佢又唔gur咁，同另一個呀姐係咁催我地點糖水，澳牛上身咁，唔講真係以為你出面成村人排緊隊。但佢催我地點野之餘，自己又企埋一邊橋埋雙手，想叫佢過黎落單，又話你嗌啦我聽到。好喇，其實個呀姐最尷尬既地方係，佢有比澳牛過之而無不及既態度，但拍馬都追唔上人地既效率同技術。兩碗糖水拎過黎，一野就瀉出黎濺到朋友條裙，真係多謝哂。如果真係堅持要咁既待客態度，請係其他方面做得專業少少。講返糖水，我覺得呢間無近北角站出口果間翠苑咁好，味道偏淡和稀。不過可能係一肚氣關係，食到d野都唔同味啦。