魚匠食堂 (Closed)

因為班機delay，夜咗返香港，返到嚟想搵餐廳食野都已經九點嘅事。而家好多餐廳都收十點，魚匠都唔例外。朋友之前食過話覺得唔錯，所以帶咗我去食個快餐醫醫肚先。去到已經九點二，店內小貓三隻食緊飯，門口女店員似乎趕收工唔係太想招呼我地...咁我同朋友嗱嗱聲落單啦，呢個時間就由男經理開始招呼我地喇。我同朋友都揀咗火灸盛丼，配三文魚同赤貝刺身，跟百香果綠茶。都知佢地趕住埋數，一落完單即刻叫我地埋單先。揀呢款係因為佢唔洗開爐煮，切魚生燒兩下，一嚟快d有得食😂二嚟無咁得罪廚房大佬。落單後幾分鐘已經有得食，個火灸盛丼同餐牌個樣差唔多，無因為趕時間而無擺盆。火灸盛丼唔算好大碗，有三文魚，帶子，左口魚之類，d魚生灸過都好食；刺身方面刀功幾好，切得靚仔，唔係碎濕濕咁。衞生理由，芥末就係獨立包裝果隻。飯係有加醋嘅壽司飯，整體加埋都好食同滿意嘅。因為店員收哂工，經理見我地好尷尬勁急咁食，仲安慰返我地轉頭，話唔緊要，佢地餐廳本身都係收十點😂我地食完好似九點九就閃咗，唔想阻人清場收工😂食物質素同性價比係中上，不過我應該會因為經理嘅好態度，而再去幫襯。