NeNe Chicken (東港城) (Closed)

今日喺將軍澳做野所以就同同事喺東港城求其搵間野食lunch，入到去8個人分開兩張檯各自order啦，咁就有位男員工過黎幫我地落單，我就叫咗個石窩牛肉拌飯，而佢就重複曬我地張單無錯就走咗去，落完單之後就等食啦，20分鐘後個個同事啲野食都上曬，就係我個餐無上，咁我咪繼續等心諗最多咪等多5分鐘，點知一等就等多咗15分鐘，佢仲要上咗個漢堡包比我，我咪同佢講話落錯單，而幫我落單嗰位男員工喺附近聽到就同我望咗兩眼，而佢都知道自己落錯，走咗去改單。等咗五分鐘佢又翻黎同我講廚房煮緊比我，我話取消咗個餐因為我唔夠時間食（你知啦打工仔咪得嗰個幾鐘頭食飯），佢同我講話比咗罐汽水我要收20，咁我都照比你鬼叫我飲咗咩。 我想講係你知自己記性唔好就搵野寫低佢啦，落錯單好多人都會，但落錯單道歉都無句，就咁走咗去改單通知翻我煮翻比我就咁算，呢種服務態度真係唔得囖。同行同事亦向員工反映漢堡塊扒細得可憐得到回復係正常。比你搞一搞我今日無中午飯食又胃痛。