大自然素食

Open Now

Now Closed

好耐都無出街食嘢，今次趁放閒日陪兩個長者去到黃大仙食午餐，揀咗入大自然食素，叫咗6樣嘢食，有燒汁蘆筍牛柳卷、香酥花枝圈、陳皮白菊素蛇羹、原盅黃耳素翅燉椰皇（職員推介嘅）、原隻木瓜蟹籽沙律、法式牛油果焗多士。食完後，我哋都覺得份量啱啱好，啲嘢食都幾特別，燒汁蘆筍牛柳卷，食落口感真係好似食緊肉咁，加埋啲燒汁又真係幾好味，而陳皮白菊素蛇羹及黃耳素翅燉椰皇，兩個都好飲，都好多料，一啲都唔似係食素，至於焗多士，我就覺得牛油果唔夠多，食唔到牛油果味，反而原隻木瓜蟹籽沙律抵食又好味。最後埋單$290，走嘅時候，幾位職員嘅態度都好有禮貌，行出店舖去商場洗手間時遇到其中一位職員，竟然都仲同我哋微笑點頭講多謝，店員服務態度真係比我想像中好。