明明車仔麵專門店 (軒尼詩道) (Moved) New Location

今晚要過藝術中心睇戲，由於去到灣仔嘅時候已經有啲晏，所以只係能夠匆匆食個麵。灣仔有好多間麵鋪，諗住車仔麵最快，所以就揀咗呢間....鋪頭都算乾淨，好光猛，但係夜晚七點幾成間鋪頭先得小貓三四隻。相信香港人都好熟悉車仔麵，一坐低我哋已經見到枱面有張紙自己點餸，我好心急畫完張紙之後已經叫侍應過嚟，叫咗幾’唔該‘都冇人理我最後我好大聲咁話‘寫野呀唔該’，先至有個男人走過來，仲好串咁同我講話，‘我哋呢度唔寫嘢！’。當其時我真係打個突，心諗你呢啲咩態度但由於趕住開場，所以諗住急急食完就算，就同侍應講話我其實已經寫好咗，要人過嚟落order。因為我唔係好肚餓，只係點左三個凈餸，蝦子餅就叫咗個三餸麵、我哋另外在點左個生菜share嚟食。冇幾耐嘢食就嚟，份量唔大，如我所料，呢個我都冇所謂因為香港租金貴。但味道真係超級普通，而且啲菜望落去好唔新鮮，黃黃啡啡咁，我點嘅牛筋上面仲有一條毛最後我哋出去走嘅時候俾錢，職員都係冇乜禮貌，你唔該或者多謝都冇句。灣仔咁多食肆、食麵嘅鋪頭、呡間野咁嘅態度真係祝佢好運。