豚道樂 (大河道) (Closed)

經過呢間拉麵店無限次， 今次終於一試真身! 周圍環境唔錯， 好乾淨，都算幾寛敞， 可以選擇坐高枱/正常枱。 餐牌總共有五種湯底選擇， 我先生就take左只限星期六，日先有既特上海老湯拉麵 ， 好味， 好濃，好鮮甜， 湯裏面仲有好多纓花蝦，一個字 ~ '得!' 而我就好想點特上日本芥末拉麵， 但係怕阿仔又唔食得 (佢得三歲)， 侍應姐姐就提議我地可以將追加個麵可以另上， 我以為會乾上，結果係成碗麵連豬骨湯上， 呢下我真係覺得好窩心 ， 而家已經好少呢種甘有人情味既食店， 其他鋪頭可能已經另收錢! 講番個芥末拉麵， 豬骨湯配上芥末又真係有d驚喜， 味覺幾刺激，連d麵都變埋綠色， 一邊食我就一邊流鼻涕 (真樣衰)，建議唔係好食得Wasabi 既人都唔好點! 豬腩肉都幾入味而且冇乜肥膩感， 怕肥人士可以試下豬肩肉， 佢瘦得黎帶點爽口而且用左黑椒調味，層次感都幾豐富！ 而我最愛食既糖心蛋亦唔失色，流心又入味！等食期間， 發現店裏都係由年青人做侍應生同廚師， 見到佢地好認真去服務， 烹製，做出左一碗碗好好味既麵， 藉此希望佢地繼續努力! 而店內亦有免費電話义電， 突顯貼心！