嘰哩咕嚕 (Closed)

西貢市中心嘅巷仔係出名嘅食街，不過又多人又唔好坐，所以以前就算喺西貢做嘢都好少幫襯入面嘅舖頭。早兩個禮拜入鹽田梓前喺度行咗一轉，經過間新開嘅叫嘰哩咕嚕，見個名咁得意，望咗一陣，老闆叫我坐低食嘢，我趕船，應承佢回程時再過嚟。大丈夫一諾千金😌，於是上岸後即刻過嚟，試咗個麻醬手撕雞冷麵，加八蚊配支久違嘅波子汽水。食呢類冷麵最緊要係個醬，除咗要好味之外，份量亦要夠多。呢方面呢碗就合格有餘，醬汁麻醬味香濃，酸酸味味好開胃，每條麵都掛滿醬汁，再配埋雞絲，青瓜絲，黑白芝麻，炸蒜粒，味道口感都豐富。值得一提，老闆好 nice 又健談，邊食邊傾，好開心🤗。幫襯黃小店，為嘅就係呢種人情味同安心感覺。安心感覺，係要用心去體會，唔係用個 QR Code 去嘟嘅😆。