利寶閣 (Closed)

老朋友喺銅鑼灣放工，大家都太耐冇食中菜，所以試下位於利舞臺21樓的利寶閣， 星期四夜晚嚟食唔使排隊， 環境同一般酒樓無異，但再加添幾分古色古香。令我印象最深刻係店員服務態度超好，又時不時會幫你斟茶遞水，服務殷勤好客，好抵讚！部長一嚟就介紹谷飼豚肉叉燒飯 配 原盅佛跳牆（$188）佛跳牆超足料，有鮑魚、遼參、魚翅、花膠、瑤柱、花菇、蹄根等矜貴食材。湯底好鮮，佢附送一碟鮑魚汁，但我覺得唔落都已經好夠味，鮮甜十足！絕對對得住呢個價錢！至於個黯然銷魂飯，叉燒用上谷飼豚肉厚切，半肥瘦，油脂分佈均勻，肉質鮮嫩，口感嫩滑！蛋黃半生熟，可以用蛋漿同埋豉油撈飯，正！同時我哋叫咗脆皮燒汁雞 ( $128 半隻) ， 雞皮香脆，雞肉香嫩，口感豐富， 配上秘製燒汁，吊出雞肉既鮮味，味道更加突出。跟住我哋嗌咗個香芒名門大蝦球（$148）， 6大隻蝦球相當吸引，而且每隻用上一個精緻小碟盛住，好的骰。每隻蝦都淋上秘製芒果汁同埋鋪滿蟹籽，而蝦球下面有新鮮芒果肉，一啖食落去酸酸甜甜，寧舍開胃！ 值得嚐嚐。埋單嗰時免費送上甜品紅豆紫米，甜甜地，還不錯！服務態度好，嘢食又唔錯，有得encore！