Texas Burger (Closed)

今日出開旺角做gym，做之前梗係要食啲嘢打下底，就揀左位於朗豪坊嘅呢間Texas Burger。手撕雞墨西哥沙律 - 同女朋友都鍾意食飯嘅時候叫1個沙律，補充足夠嘅纖維，對腸道都健康啲。手撕雞有煎香過，配合新鮮沙律菜一齊食，對一啲嫌齋食生菜覺得寡嘅人來講咁嗰日食生菜嘅人來講又係一個唔錯嘅選擇。脆魚柳墨西哥芝士夾餅 - 炸到香脆嘅魚柳，配上新鮮嘅蕃茄粒同特製嘅醬汁，頗有意外驚喜。英式香濃車打芝士牛肉漢堡 - 漢堡包嘅包皮有烘脆咗，再加上厚厚嘅牛肉漢堡扒，配上香濃嘅車打芝士，會令人忍唔住大啖大啖咁咬落去，牛肉漢堡咬落有肉汁，唔會乾身，再加上個包夠脆，整體配合得唔錯。未來素食牛肉漢堡 - 女朋友就點左呢個素食漢堡，話想要扮健康一下。食落好出乎意料地似真正嘅牛肉漢堡扒，除咗有肉味之外，口感亦都好似肉嘅咬口。其實而家嘅素食肉類，多數都有用豆類製品去做，有好豐富嘅蛋白質之餘，亦做到好似真肉一樣味道，的確係一個唔錯嘅健康之選。食完咁豐富的晚餐，就乖乖去做運動消耗返，咁下餐先可以食更多的好西😌