青花亭 (Closed)

身為偽文青，都唔會放過可以打卡既食點，單睇食物賣相同青花器皿巳經激發起我試佢既意欲，去到現場貫徹青花瓷特色，以白色為主調既簡約裝修，仲有靚女侍應同廚師。講番食物，同朋友分別叫左鮮帶子蜜糖芥末雜菌意大利飯配酥皮干邑龍蝦湯，刺身櫻花蝦烏魚子意粉，飲品檸檬茶配蜜糖同蝶豆花白桃乳酸梳打，甜品就乳酪海灘。賣相唔洗講，只係份量少，女士未必夠食，更何況係男士，好在我keep緊，唔會食飽...個意大利飯味道還好，只係帶子得兩隻，百幾蚊碟覺得可以加番的，個飯幾有咬感；至於意粉，朋友話無咩驚喜，佢仲拎富豪間中菜既櫻花蝦炒飯來比，攪笑！個湯酥皮正常，但唔知點解個龍蝦湯好腥，唔係好慣。杯檸檬茶配蜜糖都幾好飲，蝶豆花紫色就好吸睛，味道還好。最後個甜品，都係因為個樣而想試，味道都可以，其中的燕麥應該焗過，好咬口，但生果份量可以再放多d。總括而言，講餐廳裝潢，舒適度，以至食物賣相都幾滿意，但份量同味道都有進步空間。我比較支持用心既食店，加上一個靚字，朋友巳經講話想下次試下個蒸籠全日早餐，希望俾到驚喜我地。