吃什麼 (Closed)

「吃什麼」嘅前身其實係「請坐」，之前佢被逼要放棄「請坐」依個名營業落去震驚成個飲食界，跟住就有好多人介紹依間台灣小餐廳，令我一直都想試下。可惜，期望太高，我覺得有少少失望。「吃什麼」位於大館對面，門口出面大大隻字寫住「WHAT TO EAT」，非常顯眼。食物方面選擇頗多。今次我地點左原味蛋餅，外省牛肉麵(半筋半肉)，滷肉飯(小碗)，同埋花枝丸。其實，依度嘅食物普遍唔差，可惜牛肉麵係致命傷。先講好食嘅：-滷肉飯：份量幾多，肉同飯嘅比例啱啱好。肉肥瘦適中，唔會有羶味，亦唔會太鹹，唔錯。-花枝丸：彈牙，新鮮炸起，夠熱夠脆。一般嘅：-原味蛋餅：少少煙韌，不過略淡，加少少調味會更佳。失望嘅：-牛肉麵：湯底同平時食開嘅好唔同，感覺係落左西式嘅調味品，同牛肉麵好唔夾。牛肉燘得唔夠腍，調味唔夠。唯一欣賞嘅係個麵條，咬落爽彈。總括黎講，作為台式餐廳，依間唔係我嘅首選，不過每個人嘅口味唔同，可能大家會有唔同嘅諗法。