豐石板燒專門店 (Closed)

細個嗰陣老豆周不時帶我去食鐵板牛扒餐，鐵板餐上枱嗰陣淋汁嗰吓，冒出香味嘅煙霧，熱辣辣即刻食，真係加倍滋味。 不過而家有鐵板餐嘅餐廳越嚟越少，加上鐵板容易生銹，其實唔係好健康㗎咋。今次去呢間【豐】係石板燒專門店，係用熱石代替鐵板去燒肉，熱力可以keep得更耐。 如果覺得塊板開始唔夠熱，仲可以要求換板添，服務幾好。佢哋嘅石板燒套餐有湯、飯、沙律任食。我哋叫咗【美國金裝級和牛西冷M9+】同【日本宮崎A4和牛肉眼】。沙律係用透明膠樽裝住，唔駛自己夾，好方便。湯有麵豉湯，飯就可以加日本拌飯素。石板上枱啦，穿上餐廳提供嘅圍裙手套就唔怕俾油彈到。 石板好乾凈，先落牛油再落靚牛，燒到兩面熟就食得架啦。兩款牛肉都相當出色，油脂豐富，日本宮崎A4和牛肉眼就滿口油香，美國金裝級和牛西冷M9+就夠肥美厚切，各有特色。 由於油脂豐富，所以送飯食會冇咁膩，啲飯軟綿綿又幾好食。飲品我哋就加$10飲自家製蜜桃烏龍冷泡茶。 冇落糖但飲落蜜桃味道好香好突出。食完再飲冷泡茶解膩，相當滿意嘅一餐～