Augur-7 Pizza house @ Japanese Cafe (Closed)

今日姑姐生日，本來plan食日本野，不過姑姐又話平時食得太多想轉下口味，又要近屋企係旺角附近食，諗來諗去，醒起有間佢未食過，就帶左佢來食。哩間野因爲唔係地鋪，唔係我朋友帶我來食都唔知道有哩間野。果次來食因爲得兩個人試唔到好多個餸，不過味道又真係唔錯，同埋環境雖然唔大，不過坐落舒服傾得自在。今次來食，姑姐一來就點左我上次食落都幾鐘意既酸忌廉芝士薯條，薯條熱辣辣食落都算ok,點埋佢既酸酸地既忌廉醬真係幾好味。我女朋友就點左個蒜蓉包，唔大隻，一啖就可以食左一隻，不過好鬆脆，都幾香。然後就叫左個蜜汁雞翼，都幾甜幾滑，不過如果雞翼可以再大隻少少就好。仲試左個螺絲粉同埋pizza.粉都算ok,不過就比較普通，但是pizza就幾好食，個批底都幾厚幾脆，而且料都幾足，咬落都幾滿足幾爽，腸仔口感都唔錯,所以叫左兩個批來食，最緊要食得爽，價錢都算公道，份量都唔少，加埋佢地既服務態度都唔錯，所以會再來