Video
Read full review
2008-04-24
20 views
呢次食評會比以往的長一點點，請各位耐心睇完整篇文章，多謝~今日放工，突然間決定去前幾日放棄冇去o既粥店，去食之前曾經食過o既田雞粥。這個食店位置幾隱蔽，因為佢係位置鴨記(鴨寮街)旁邊o既地舖。呢間麵家有幾十年歷史，不過因為位置問題而好多人都唔知道呢間店o既存在。入店o既時候，店內客人唔算多，搵到位後就立即點o左兩樣生劏田雞粥同鮮鯇魚皮。前者在上次因為帶病食唔到原味，後者一直都係小弟其中一樣至愛食品。先o黎o既係鮮魚皮，呢度同外邊o既店有少少唔同，因為用o黎點o既豉油會分開上，避免o左"魚皮浸豉油"o既情況出現。呢次o既味道同上次一樣都差唔多，唯一要彈o既係"老闆娘唔該開細少少個雪櫃，魚皮上面有o的霜啊~" 囧"我好快就食哂o的魚皮，大約等多幾分鐘後田雞粥就到喇。先聞一下，唔....有微微o既米酒香味，有米酒o既原因係用佢o黎辟走田雞o既腥味。呢次粥底少少綿，粥有米香之餘亦帶一o的o的田雞肉o既甜味。先食田雞腿，嘩!好鮮甜!肉類幾有咬勁，果然係新鮮田雞用粥生滾出o黎先有o既味道。一碗田雞粥用上一整隻田雞，味道自然清帶濃而味亦鮮。自我十幾年前o係塔門食過o既鮮帶子粥有咁o既鮮味之外，呢次係
今日放工，突然間決定去前幾日放棄冇去o既粥店，去食之前曾經食過o既田雞粥。這個食店位置幾隱蔽，因為佢係位置鴨記(鴨寮街)旁邊o既地舖。呢間麵家有幾十年歷史，不過因為位置問題而好多人都唔知道呢間店o既存在。
入店o既時候，店內客人唔算多，搵到位後就立即點o左兩樣生劏田雞粥同鮮鯇魚皮。前者在上次因為帶病食唔到原味，後者一直都係小弟其中一樣至愛食品。
先o黎o既係鮮魚皮，呢度同外邊o既店有少少唔同，因為用o黎點o既豉油會分開上，避免o左"魚皮浸豉油"o既情況出現。呢次o既味道同上次一樣都差唔多，唯一要彈o既係"老闆娘唔該開細少少個雪櫃，魚皮上面有o的霜啊~" 囧"
我好快就食哂o的魚皮，大約等多幾分鐘後田雞粥就到喇。先聞一下，唔....有微微o既米酒香味，有米酒o既原因係用佢o黎辟走田雞o既腥味。呢次粥底少少綿，粥有米香之餘亦帶一o的o的田雞肉o既甜味。先食田雞腿，嘩!好鮮甜!肉類幾有咬勁，果然係新鮮田雞用粥生滾出o黎先有o既味道。一碗田雞粥用上一整隻田雞，味道自然清帶濃而味亦鮮。自我十幾年前o係塔門食過o既鮮帶子粥有咁o既鮮味之外，呢次係第二次。
食完次後，感覺有o的意猶未盡，睇睇一餐牌見到淨雲吞只係$17，咁就要多一碗o黎填飽個肚啦。
o係我介紹呢個雲吞之前，想講講一段故事。
o岩o岩過o既新年，阿媽由加拿大番o黎渡年，有一日佢突然o係食緊o野時好慨嘆咁彈o左句出o黎：唉，依家o的雲吞真係唔好食，話就話係雲吞，其實就係"蝦吞"，同以前完全係兩回事。聽完之後我深有同感，記得細個o既時候，雲吞o既材料唔係以蝦為主，而係雲吞內o既碎豬肉。
依家市面上食到o既鮮蝦雲吞，其實係由廣州o既雲吞演變出o黎。以前o既雲吞以全豬肉為餡料，食落去會較硬但係肉汁美味，加上混入大地魚粉/碎令到鮮味得以大大提升。後來香港有一位麵食師傅，諗到加入小量鮮蝦o黎增加雲吞o既口感，結果就變成我o地依家成日都食到o既鮮蝦雲吞喇。
無可否認，依家o既雲吞以蝦為主，但係好似有o的想變成以淨蝦肉為餡o既趨勢......
以上呢一後說話，係當我食雲吞前突然諗番起，心諗自己大小老新名店o既雲吞都有試過，唯獨是"地道"香港鮮蝦雲吞真係好耐好耐都食唔番。咁o岩呢個時候，淨雲吞一碗就出現o係面前，先問侍應攞豉油碟o黎裝坐大紅浙醋，之後望一望粒雲吞，一口咬o左一半.......
突然間，我控制唔到咁爆o左個字:嘩!
之後再張開口食埋剩底o個半粒雲吞.....
食完之後，我整個人靜o左落o黎，冇出聲......雙眼突然一紅，我知道，我終於搵番最地道o既鮮蝦雲吞喇。呢一刻真係好感動，就好似遇番好耐冇見o既朋友咁樣，實在好開心。
雲吞唔似一般貨色咁包到好實，肉碎混入大地魚之餘，隱約帶住一陣香味，好似係蝦子但係又唔係好肯定。雲吞每隻大約有一至兩隻少o既鮮蝦，彈口之餘蝦o既鮮味同肉味互相配合，實在冇o野可以挑剔。
不消一刻，一碗八粒o既淨雲吞就食完，個心好滿足。當我俾錢o既時候，問老闆娘除o左大地魚之外，o個陣香味究竟係咪蝦子。老闆娘停o左一陣先講，佢o地用o既係叫做芝麻糠，即係將炒香o左o既芝麻磨碎再混入肉餡之中，唔怪得食o既時候陣香味比蝦子更加香!
o係香港要食到地道味道o既食店真係唔多，能夠生存到依家只係少數中o既少數。再加上以$17價錢就有八粒咁美味o既雲吞，得罪講句，麥奀記所謂o既正宗雲吞都唔及呢度咁地道。
所以基於呢一點，要獻出"第一次"，<<味道滿分!!!>>
(對不起了浙醋，今日你唔駛出場辟梘水味喇，因為冇咁o既需要^^")
Post
