端記茶樓

Open Now

Now Closed

川龍端記茶樓位於荃灣大帽山川龍村，一直係行山人士嘅聖地！呢日就同埋幾個朋友仔一齊行完山就去左川龍最有名嘅茶樓-端記茶樓飲茶喇！呢間茶樓最特別嘅地方就係所有野，無論揾茶位、拎餐具、沖茶、拎點心都係自助式，由於係自助式嘅關係，點心好快一出爐就俾人搶哂，所以等點心都需要啲時間架，不過可以係咁郊外嘅地方嘆茶，慢慢都無所謂喇，而點心款式，都不外乎蝦餃、燒賣、包、腸粉等等，而最出名就係豆腐花同埋西洋菜喇！因為茶樓食用嘅水係來至山水，所以整出嚟嘅豆腐花都特別滑，好好味！西洋菜都係用川龍山水種植嘅，全部都係新鮮採摘架！食落真係好嫩好有菜味！有好多茶客食完之後仲落左附近嘅西洋菜田買幾袋返屋企煲湯添！如果假日想揾個地方遠離塵囂紓解一下，可以考慮下上嚟大帽山行下山，再去川龍村飲杯茶嘆一嘆！