新樂園

Open Now

Now Closed

畸寶人會叫柴灣角嗰排熟食檔叫大檔，呢間係畸寶人至愛飯堂之一，本人一星期至少會食一次。畸寶人都會叫佢「泰婆」，叫佢新樂園反而無人知你想去邊度食。有個水mark mark嘅泰裔事頭婆，經常笑容滿面。大牌檔當然有戶外位，呢度頭頂部電視播嘅電影仲新過有線電影台。佢都有一個板間室內冷氣房，密密坐大約可坐30人。掛住泰王嘅相，又有寄賣啲泰國手工布袋，大牌檔中的異國情懷。除泰式之選外，午餐都有兩三款港式炒麵飯，照顧唔同客人需要。我叫得最多係阿澤都讚好嘅海南雞，講真四十幾蚊又唔好要求隻雞會識飛，我覺得最重點係個泰式酸辣姜蓉汁，單單係佢都送到幾碗飯。lunch遲咗去有時油飯會賣哂，得白飯。有時轉吓口味，豬手飯都唔錯，好冧好入味好多骨膠原。叻沙個湯底就無黑色百勝廚即食麵咁香濃，不過都唔差。黃咖喱充滿椰香，配炸脾或豬扒都係超大份。畀錢係食完自己行去老闆娘度講自己食過咩，大家講個信字。