Tung Chung Pizza

Open Now

Now Closed

秋高氣爽，最啱去完山⛰，行完山肚仔打晒鼓，去到東涌上嶺皮見到屋頂有個招牌寫住Tung Chung Pizza🍕，呢間店舖細細間，係住宅式店舖，似係外國人經營，成間店都係外國人staff，佢哋都好nice。我哋點咗鮮味蜆仔意粉🍝，個意粉一上檯就有驚喜，廚師好細心咁分成兩團意粉，啱晒2個人份量，唔需要自己再分，而且啲蜆排得好整齊好靚，圍住晒啲意粉，啲蜆都好鮮甜。意粉超煙韌，食落有嚼勁，係我鍾意嘅口感！意粉炒得好香口，有微微辣椒油、黑椒、香葱，帶點微辣🌶，食落非常美味，鍾意食意粉嘅你絕對要試下！😋😋😋珍寶燒豬排骨🐷有得揀全份或半份，我哋點咗個半份都食得好飽，肉質夠稔，燒汁味道適中，唔會過燶，啲配菜薯角炸到金黃色，未食已經知道炸得好脆口。呢度仲有外賣，見到外賣電單車🏍不停出車，啲訂單接到無停手，我見佢啲價錢都好好經濟實惠，仲有好多唔同套餐選擇，簡單打個電話或者whatsapp都可以落單，免費送到。由於呢個地方唔太近地鐵站，不過如果平時喺東涌附近，一個電話仲有專車🚙接送你去餐廳添，真係超方便。