龍朝牛雜牛腩專門店

Open Now

Now Closed

中午放飯又同同事們去搵食，諗住試下d未食過既餐廳，係唔知食乜既時候就見到呢間龍朝，就廢事諗咁多入去食，先睇個環境都幾整齊企理，燈光鮮明有幾張4人枱同6人枱。睇過下餐牌見到有崩沙腩，一定要試，另外都仲有d飯餐，肚餓既可以選擇食飯，另外枱上竟然有樽菜脯俾你任食，鍾意食菜脯既朋友呢次爽皮啦。崩沙牛腩河崩沙腩位置近牛肚皮同橫隔膜，有少少筋膜同肥膏，食落口感豐富，牛腩味都幾足，大約有7-8塊，河粉質素都唔錯，唔會煮太腍唔易斷唔易散，配料有2件蘿蔔，蘿蔔無渣但唔算好甜，都可以，湯底黎講就唔算濃味，所以再加返少少潮式辣椒油同菜脯就昇華晒，真係好耐無食過咁好食既腩河。牛雜河同事就揀左牛雜河，佢就話牛肚比較硬d，d牛似後擺落去食落乾身d，始終無崩沙腩咁正，勝在幾大碗，河粉有質素。另外加14蚊跟套餐就多個油菜同飲品，我地就揀左菜心同通菜，菜既部份我略為覺得煮腍左少少，同埋比較油，而菜都唔算好甜，只屬一般，飲品都係奶茶咖啡之類，正常水準。整體而言對呢間龍朝既食物質素都算滿意，想食崩沙腩呢間都係幾好既選擇。