茶餐廳2.0 (Closed)

大埔友周圍搵食，原來昌運中心對面開左間茶餐廳2.0。 個名好特別，食完先知原來真係茶餐廳嘅進化版。 有石燒和牛、心太軟、雞蛋仔、珍珠奶茶都有，誇張吧！有齊中式西式晚餐，同屋企人叫左個中餐【紅燒茄子炆倉魚$78】同【石燒A4日本和牛片100g $168】share食。甘筍湯比預期中濃稠同香滑，好飲喎。紅燒茄子炆倉魚好大條，用左紅燒煮法夠惹味，個汁用嚟撈飯仲正。 茄子明顯走過油，仲保持紫色同鮮甜。期待嘅石燒A4日本和牛片終於上枱，鐵板好熱，要小心！ 係呀，係鐵板唔係石燒嚟架。 不過一睇啲牛就知係日本和牛，啲雪花紋靚到咁，無得呃，而且有兩層，份量都唔少架。 一放落鐵板吱吱聲，牛油香味爆晒出嚟，連隔嚟枱都望住我地。 連埋慢煮雞蛋同甜粟米同飲品，$168個餐係好抵食，有驚喜。兩個主菜都包左好大個飯，真係大食人仕都會好夠飽。雖然好飽，但又好想食甜品，香蕉千層雞蛋仔$38都幾巨型，上面排住一片片香甜嘅香蕉，加埋微脆嘅雞蛋仔，我地係食晒，yummy。 最後同屋企人捧住個肚走。