夏麵館 (荷里活廣場)

Open Now

Now Closed

以前細個同屋企人去完慈雲山探親人，就會落去荷里活廣場食夏麵館，印象中佢哋啲粗炒同小籠包都幾好食。到今時今日都已經幾年冇去過，咁啱今日路過就入去緬懷一下，結果中咗伏！！！先講服務態度，我同屋企人12點前已經入左去，店內尚未坐滿，店員亦聚集一起聊天，但我哋行到店中間店員先發現我哋，繼而詢問我哋人數。係咁嘅情況下仲收加一服務費再講食物，我哋冇叫套餐，散叫一個上海粗炒、一個小籠包、一個酸辣湯（例牌）、一個炒年糕。最先上嚟嘅係酸辣湯，完全唔熱剩係得暖，我哋唔介意佢係隔夜嘅(起碼冇臭味)，但你都應該完全翻熱晒先攞上檯掛？煲嘢用塊木板墊底攞上嚟，以為好熱，結果隻手掂個煲淨係覺得暖？？？小籠包正正常常，起碼佢熱過個酸辣湯。最後一個粗炒同炒年糕，賣相望落去還算可以，但真係得個賣相，純粹老抽落得夠，但食落去係唔夠味，而且碟底啲汁係水嚟，根本唔算得上係汁。啲年糕幾塊黐埋一齊，年糕中間根本冇味，直頭係白色。環境方面，尚算乾淨，但係啲枱好窄，偏偏啲碟全部都好大隻，唔夠位擺。冷氣亦未夠，飲飲下酸辣湯覺得好熱。