緣聚西日餐廳 (西裕街) (Closed)

趁學生八達通優惠就嚟完，今日決定去遠d既元朗搵下野食。問咗住元朗嘅朋友，佢推介我哋嚟食呢間抵食放題。但位置確實距離元朗站有少少遠，但好近出名既甜品店，所以開住地圖都唔難搵。價錢果然唔算貴，食物種類都算好多。最令人驚喜就係呢度既飲品有一大個櫃都係罐裝同樽裝啤酒，岩哂酒鬼！刺身就係放題基本，呢度既刺身都好新鮮，象拔蚌同螺都唔會硬到咬唔到，仲好鮮甜。壽司每樣細細件，食多2件都唔怕。蒜蓉帶子壽司係最令我難忘，好香口，帶子size都好夠大，唔會得飯冇餸。呢度仲有2款燒蠔，雖然size唔算好大但每隻都脹卜卜有蠔味，燒完仲好香。熱食方面有2款都好正，包括充滿鹹蛋黃既黃金蝦，d殻都炸到好脆，可以成隻食！另外燒羊架都好值得一食，唔會有"蘇"味，又唔會好多肥膏，冇諗過放題熱食都有質素。食埋甜品就大滿足，呢度有好多款雪條，撻，仲有豆腐花同乳酪。總結，呢間比較隱蔽既放題真係好抵食，食物質素都高上，上菜收碟都好快手冇甩單，去開元朗會再幫襯。