王林記潮州魚蛋粉麵

Open Now

Now Closed

專程過嚟試吓呢間潮州粉麵，差唔多午市尾聲唔使排隊剛好有兩個位。嗌左一碗魚蛋牛丸河$43，一碗魚蛋墨丸河$43，再加一碟牛腩豬手$120。價錢來講係算係偏貴少少，不過要再睇睇質素先可以再評論。等緊嘢食之際，見到枱上面有幾樣普通粉麵舖少有嘅，有冬菜，仲有兩種辣椒油，有小辣同埋大辣，幾細心。我就加咗大辣落我碗河粉度，真係幾辣，不過好香，落咗幾滴都已經好夠味。河粉幼滑煮得剛好，夾起嚟唔會爛晒，掛到湯，望落去少少透明，係幾高質嘅河粉。到主角，所有丸都好新鮮，完全冇雪藏味，魚蛋和魚片彈牙，冇腥味，牛丸好有牛味，但係就唔係好夠彈牙，墨丸真材實料，食到墨魚粒，不過都係略欠彈牙，但係整體味道唔錯，碗河粉仲加咗條芥蘭，湯底聽講話係用魚骨煲，有鮮味，我就連湯都飲埋，咁嘅質素喺香港已經少有，自從冇咗香港仔嘅謝記，都已經好難搵到好食嘅潮州粉麵，呢間已經算係比較接近謝記。反而呢度嘅牛腩比起魚蛋更加精彩，牛嘅部位好靚，有啲牛筋黐住啲肉，火候剛好，炆得好鬆軟，好多肉汁，值得一讚，相對豬手就冇乜特別。整體來講質素同埋價錢成正比，會再返嚟試其他嘢！