CURATOR Art & Café (Closed)

今日趁住放假約咗朋友去尖沙咀行街睇戲,喺k11 musea睇完戲諗住喺附近搵啲嘢食,朋友帶咗佢去一間好特別,好有格調嘅西餐廳。Curator Art & Cafe , 餐廳裝修得好有格調,天花板燈光會轉變顏色,坐位空間感好足夠,光猛整潔感覺真係好舒適。橄欖油炒墨魚汁意粉配帶子,第一次食墨汁意粉,估唔到普通意粉更加香口,加上意粉煮到啱啱好,煙煙韌韌口感彈牙,鮮帶子有五粒每一粒都好厚身, 煎香咗嘅帶子入口鮮甜,口感嫩滑,配上墨魚汁意粉將兩個鮮味帶出,味道好有層次, 最鍾意佢就係加咗啲蒜片,多一份蒜香味道。幾種味道佢夾埋一齊真係配搭得啱啱好,真係做到色香味俱全。香煎慢煮三文魚扒,三文魚扒外皮煎到好香脆,入口有少少鹹香口感脆卜卜,三文魚肉肉質嫩滑入口仲要好juicy,加上有少少魚油脂肪,味道特別香口惹味,食落去一啲都唔會油膩,越食越開胃,配上旁邊嘅蒜香忌廉汁,令到三文魚嘅鮮味更加突出。旁邊嘅三文魚子增添口感同鮮味。