炊豕店 (威靈頓街) (Closed)

呢間舖頭都開咗一段日子，每次經過都見到好多人排隊，心諗一定係好好食㗎喇。星期五特登早少少放食飯，搭正12點就出門口，去到12:10，已經要排隊啦。排隊嘅時候望入去，見到客人碗飯好似幾大碗咁，塊豬扒亦都好似好厚。我同大少叫咗肉燥汁豬扒飯，同埋梅菜扣肉飯。我肚餓到連相都唔記得影，可能太肚餓所以就覺得肉燥豬扒飯味道唔錯。但係大少嗰個梅菜扣肉飯就認真好唔掂。啲扣肉好嚡，食落去嘅感覺好似食緊煲完湯嘅瘦肉咁，唔係太入味。大少食到一半已經冇再食扣肉，只係用梅菜撈飯。炸豬扒味道唔太差，但係而家夏天烈日當空，如果要排隊嘅就可以唔需要特登去試，買外賣有折頭，又唔需要身水身汗咁等，可能會更加好。