松坂庫 (Closed)

今早出左尖沙咀拎朋友仔送俾我嘅手信，路經松坂庫見到有一SET櫻花甜品，為食的我當然入去買份嚟試啦~一入到松坂庫，我就二話不說就ORDER左櫻花牛奶雪糕，隨雪糕仲附送櫻花水信玄餅~店員姐姐好細心咁幫我整雪糕啦~其實櫻花牛奶雪糕即係牛奶雪糕上面，撒滿粉紅色嘅櫻花粉，而且都幾重手，成杯都成為粉紅色啦~店員姐姐一切準備晒就問：『準備好影相未？』，原來係方便我地影低依個夢幻時刻，又真係幾貼心哦~嘩...真係好靚，相信如果小小豬在場，佢一定睇到嘩...嘩聲呀~ 其實我自己都整過幾次櫻花甜品，但都真係唔知用咩味嚟形容佢好。不過依個櫻花粉就甜甜地再加有少少嘅鹹味，配埋滑身牛奶味雪糕一齊食，個口感又唔錯呀~櫻花水信玄餅味道又點呢~依照我依個BB級廚師嚟睇，櫻花水信玄餅其實都係用寒天粉加一片櫻花整成嘅一個啫喱。我個人就覺得依個比較硬身，如果可以軟多少少，應該更加好味~哈哈哈...其實都好易整，屋企又有晒材料，等我搵日又試下先！不過整體上一SET櫻花甜品都真係食得過，$28有雪糕又有啫喱，最好就係有埋枱同椅子俾你坐定定慢慢歎。下次一定要同小小豬嚟，等佢開心下先得！