松記糖水店 (Closed)

早幾日想食芋頭西米露，屋企樓下無選擇情況底下幫襯左間包羅萬有的小食店。心裡面雖然已經打底知道樓下唔會有味食，但食嗰吓仲一樣覺得中伏。點伏法？咪係西米還西米，芋頭還芋頭，兩者完全無交流無融和，伏伏伏。算叻，小食店不能要求太多。今晚食完飯經過糖水舖，話晒有十間八間分店，心諗普通中式糖水呢啲基本嘢應該無甩拖。點知⋯ 伏伏伏 伏伏伏⋯ 直昇機起飛喇！點伏法？屋村樓下包羅萬有小食店就話無廚房，每樣嘢都係來貨加熱買啫。你糖水舖嚟架，芋頭西米露呢啲基本嘢你竟然都做得唔好？！西米同芋頭根本無一齊煮過，芋頭唔粉唔淋，又無芋泥，睇張相已經解釋晒 —— 芋頭起角架！依家食泡菜呀？有無煮過架？芋頭煮過條邊一定會糊化。唔好同我講芋頭唔當造呢啲藉口，作為一間糖水舖，來貨唔靚應該就直頭停賣呢樣嘢。成碗嘢，西米還西米，芋頭又唔淋，花奶還花奶，椰漿少到真係唔知有無落過。幾樣材料無融合一齊，有如車仔麵㨂配料。咁整出嚟真係侮辱咗芋頭西米露呢款菜式！希望集團老細好好反思一下。