金山海鮮酒家 (Closed)

依排天氣唔多好，間中整場驟雨，仲要勁大嗰隻，次次都打波先哩落雨，好無癮！遇啱有老友生日，一於慶祝慶祝食番餐，消消悶氣，既然消悶氣，就搵間好食D嘅，有人氣嘅，就金山啦，一於食豪少少咁話！一行五人，揀咗上棲位，（金山除地鋪，二、三樓都有鋪位），貪佢稍為靜局D，不過，一到8:00pm旺場時間，都係變番嘈嘈閉架喇。五個人，六個餸，夠晒啦！為顧及各人偏好，又唔可以叫晒海鮮，咁就先嚟個小食食住先，沙薑雞腳，可惜我哋唔好酒，如果唔係送住啤酒「lun」雞腳，幾爽呀！一路食住個雞腳，一路諗叫乜！諗掂！肉類，叫咗個雲英雞（又係雞，有老友真係好鐘意食雞）同黑椒牛柳粒。個雞夠嫩又夠味，果然雲英未嫁，不過老實咁講，又嫩又滑嘅雞好多地方都食到，依度嘅又未至於「氹」一聲好特別！而個牛柳粒好軟腍，但又唔似用梳打「嗱」到鬆晒咁，食落無渣，惹味夠鑊氣。蔬菜類，勝瓜浸煮貴妃蚌，無咩意見，OK囉！輪到海鮮類，椒鹽瀨尿中蝦同豉椒炒蟶子皇！前者真係幾正，蝦身好大隻吓，啖啖肉，椒鹽爆炒非常入味，又無過鹹，夠香口；相反，個蟶子皇其實都唔錯，但稍為失色少少，豉椒都惹味但唔及椒鹽咁搶，而蟶子皇無咁有肉地，又唔算好爽身，感覺差少少。飯後送