季季紅風味酒家 (Closed)

本人於 2017 年 3 月 24 日晚約 8點半度，响季季紅門口經過，本身想買飯盒食，又見到佢有外賣燒味飯賣，咪買嚟試下囉。叫左燒鴨飯，到燒味哥哥就嚟包盒飯時，我問佢拎薑蓉，咁佢即刻好惡咁話：“包左喇，下次早啲講吖。” 我心諗，我以為你係比現成 pack 好嘅薑蓉嘛，同埋你都係揭番開個飯盒啫，唔會難得過你斬燒鴨啩，我都諗住唔比咪算囉。點知佢鬧完我之後，望一望我，仲嬲啲咁再重覆一次：“下次早啲講吖”, 跟住就一大 pat 薑蓉咁筆落啲飯度。我完全明白呢位哥哥嘅心路歷程，好明顯佢望到我個樣傻下傻下知道恰得, 就放心再兇你一次，再諗咁鍾意薑蓉丫喇，比你囉。番到去食，食過呢啲飯都知道都係食頭頭尾尾㗎啦，再加埋啲飯比薑蓉浸過哂，真係咸到驚有腎病，咁就冇左廿二蚊。食唔飽唯有再落去買其他野食，經過季季紅門口見到佢地咁慘淡嘅情況。其實呢間野雖然唔係好食，但都不致於生意咁差，鬼咩，請左啲咁嘅伙記。其實之後我都有响地廳堂食過一次，以前有個做左好耐嘅女經理冇做，成班職員而家好似烏合之眾咁，玩下玩下响度 “扮工”, 啲野又貴又難食。唉，真係祝呢間野好運。