木船泰國粉麵專門店 (Closed)

太耐冇食過泰國嘢，今日就試下開咗一段時間嘅木船啦。裝修係模仿一隻船，係一個好特別嘅餐廳。我地一行三人，叫咗兩個套餐三個小食，兩杯嘢飲。叫咗一個香葉肉碎配脆脆雞翼飯同招牌燒豚肉飯。兩個飯既份量都大，而雞翼係好香脆，唔會太乾身，但個人認為肉碎唔夠辣，同行朋友就覺得可以接受。重頭戲黎啦，個燒豚肉飯我哋三人一致認為係好好，因為食到炭燒既味，而且仲充滿肉汁，超級香口，極度推介而每一個套餐都會跟三款小食一個湯，小食有腐竹卷，沙律蛋同朱古力小蛋糕，湯就有冬陰功湯同鮮雞湯。比較出色既係冬陰功湯，夠辣而且鮮味夠出另外我地仲追加左三款小食同兩杯嘢飲。小食有泰式炸魚餅，木瓜沙律同泰式鳳爪。個人中意食泰式炸魚餅，因為好彈牙，而且唔會有腥味。但朋友就鍾意食泰式鳳爪多啲，因為配合埋蔬菜，成件事好fresh。嘢飲方面，我哋叫咗青檸梳打同新鮮椰青。兩款嘢飲都鍾意，因為青檸梳打夠酸，夠氣，椰青夠甜，而且又大個食完個個都捧腹而走