Y Pasta (Moved) New Location

銅鑼灣嘅L Place好多嘢食，而且好多都坐得好舒服，又唔會太多人，今日就去咗Y Pasta 食 lunch。佢哋嘅午市套餐非常之抵食， $100左右有湯、高質嘅意粉、同埋一杯嘢飲。所以我同朋友就一人叫咗一個set。朋友最近個鼻有啲唔舒服，所以叫咗法式芝士浮台洋蔥湯，法式洋蔥湯上面通常都會有一塊包，浸落去碗湯上面吸收晒碗湯嘅味道同精華。如果肚餓嘅可以叫呢個湯，就有啲嘢食住先。點樣知道碗湯足料呢？就係因為朋友食完之後話個鼻即刻通返晒，都唔知係咪心理作用。我就叫咗個忌廉黑松露野菌湯，本身忌廉湯已經好好飲，黑松露油仲非常之香，未飲已經好滿足。我叫咗卡邦尼蛋汁意粉，有別於一般嘅卡邦尼意粉，呢度加咗蛋汁，比平日食到嘅味道更加濃郁，煙肉亦都做到啱啱好香脆。朋友叫咗柚子胡椒雞肉扁意粉，小小辣辣地之餘又有好香嘅柚子味，味道非常清新。飲品方面我哋叫咗蜂蜜檸檬，清清哋甜甜哋，配合返頭先較為膩嘅卡邦尼意粉。朋友就叫咗杯Cappuccino，賣相睇落去都好吸引，睇得出係有誠意嘅咖啡。