樂雅軒 (Closed)

一家大細有老人家揾間坐得舒服啲嘅地方食團年飯， 過時過節都好難book到地方，朋友介紹到沙田小瀝源恆生管理學院嘅中菜廳， 對面嗰啲村屋有錶位可以泊車，呢度冇限食嘢嘅時段，唔使趕住走。等人嘅時候阿女嗌肚餓叫咗個脆炸豆腐， 公公婆婆都爭住食。先上熱辣辣嘅菜遠炒牛肉，牛肉淋菜心嫩， 師傅手勢唔錯表弟鍾意椒鹽炸鮮魷， 一上枱個個爭住食， 美味可口!公公點咗士多啤梨一字排， 酸酸甜甜佢最鍾意店員介紹炸海鮮卷，雖然得六塊， 大大條兩個人share都夠。阿女點咗個家鄉煎蓮藕餅，好香口，師傅可能來自順德，呢個菜整得唔錯，好好食跟住係妹夫最鍾意嘅發財南乳豬手， 炆得好林好入味!個沙薑雞熱辣辣上，可惜畀婆婆發現隻雞斬完再蒸返熱，有啲韌，冇乜雞味最後先上清蒸海斑，食慣海鮮嘅公公發現呢條魚蒸熟後廚師冇放上熱熟油，只係得蔥白絲同埋得個甜字嘅豉油，確實有啲失敗，嘥咗條咁新鮮嘅魚桂花糕應該係用咗大菜糕去整，爽口。個蛋散可能炸好之後受潮，咬落去唔脆，韌咗。好彩最後餐廳送上果皮紅豆沙，煲得唔錯，呢個師傅有料到