三木日本料理 (Closed)

一入到去,見到依度舖面夠大,裝潢幾靚,D座位都坐得舒適,對依度既第一印象幾好,今次同朋友黎食,氣氛都唔錯。講番食物,依度選擇幾多,壽司、刺身、炸物、小食、甜品樣樣都有。首先試左D壽司、刺身,食材新鮮,尤其係海膽,分別點左3次,海膽既份量足,而且味道鮮甜!!有食開海膽既都知道稍為唔鮮既海膽一係就變左色,一係就流失晒D甜味,依度D海膽真心好食! 刺身亦都排到靚靚仔仔咁拎出黎,甜蝦、北寄貝同吞拿魚都好甘香!小食方面,燒青口、牛柳粒、燒冬菇、燒菠蘿都幾開胃!甜品方面,我最鐘意係焦糖燉蛋,焦糖夠脆、蛋夠嫩滑,加埋焦糖獨有既香甜,真係好好食;而另外柚子味雪糕亦都有D驚喜,食落好清新,食到咁飽,食番個清清地既甜品好消濟。整體黎講,我對三木既印象好好,坐得舒服、食材新鮮、美觀,而且每次落完單,D 野食好快就上,最滿意係落過既order完全無甩漏,點幾多上幾多!我最怕係你食到第二、三輪先上返第一輪order過既野,咁就好激氣!而今次絕對係愉快既放題體驗!