瀛喜日本料理 (Closed)

不論係酒店自助餐定係日本放題，食得任食就一定要多選擇! 今次呢間瀛喜喺呢方面真係冇令我失望~好出奇地今次食得最多嘅唔係我最愛嘅天婦羅，反而係壽司佢嘅壽司真係好多款式，每嚿都比平常食開嘅細，咁就可以試多啲唔同款啦最鐘意係佢嘅元貝壽司同埋牛肉壽司，特別欣賞嘅係元貝上面嘅醬汁，甜甜地同主菜好夾，令到個鮮味好出，而且呢度嘅飯都做得幾實淨，唔會一夾就散。牛肉壽司唔似平日出面食果啲淡而無味嘅牛肉，佢真係好有牛肉味，再加少少葱花，睇落靚之餘又好食!不論反卷、手卷、普通壽司定軍艦，好少見到有放題會咁focus去做咁多款嘅壽司，雖然話壽司易飽肚，但係好食又不妨多食~ 反觀番平日鐘意食嘅天婦羅，雖然唔會話炸粉落得太多，而且蝦鮮、蕃薯甜，但係炸得唔夠脆，冇咗果種天婦羅嘅質感，係我今次捨棄天婦羅轉食壽司嘅原因之一~