三點三冰室

Open Now

Now Closed

去Airside想食得經濟啲除咗food court仲有呢間冰室選擇。呢間冰室款式多，除咗傳統嘅炒粉麵飯之外，仲有好多小食可以揀㗎。芝心蝦多士$72估唔到茶餐廳都有得食蝦多士，仲要係有芝士夾心嘅添，一口咬落去先係脆脆嘅多士，然後係少少彈牙嘅蝦膠，中間仲要有Creamy流心芝士，沾上沙律醬食就更加邪惡。鰻魚滑蛋炸熱狗 $75賣相勁吸引，原條鰻魚加上滑蛋鋪喺炸熱狗上面，食嘅時候加埋一啲鰻魚燒汁，香口又唔會好乾，好滋味。鰻魚質素OK，雖然唔係話好肥美，但係起碼冇骨唔腥。XO醬虎蝦炒公仔麵$83呢度嘅炒公仔麵炒得好好，有鑊氣之餘唔會好油膩， 公仔麵爽身，唔會太淋摺埋一嚿。XO醬味道恰到好處，唔會好辣，惹味惹咁。加上有4隻虎蝦，新鮮爽口，材料足。焗豬扒飯75焗豬扒飯嘅茄汁味道啱啱好，唔會太酸，仲有全塊菠蘿，酸甜酸甜好醒胃，汁夠多食晒成個飯都夠撈。豬扒已經切件，食得好方便，肉質唔會硬，一般茶餐廳應有嘅水準。雪糕紅豆冰$42去茶餐廳我鍾意食返杯紅豆冰，呢度啲紅豆煲得好淋，又大粒，唔太甜好好飲。