金田家 (Closed)

今日同寶貝女去荃灣行街， 個女話好掛住日本嘅拉麵,見到來自九州第一拉麵店金田家，忍唔住話要入去食返日本的味道。揭一揭呢度嘅餐牌，嘩都幾多選擇。 飯同麵同小食都有好多款，選擇多過係日本食。竟然仲有餐前小食，有三款漬物。濃豚骨拉麵78蚊，好大碗， 麵質軟硬度可以自行選擇。有四大塊叉燒，仲有木耳， 湯底濃郁而不鹹不膩，日本感覺返哂黎。怕唔夠餸食，仲可以追加配料。糖心蛋14蚊一隻，木耳同粟米最抵食，只係需要加七蚊。飯方面，叉燒豚肉飯喺日本經常見，鰻魚飯就比較少見。所以我今晚點左鰻魚飯試試。鰻魚燒得香軟甜甜，配埋漬蘿蔔，送飯一流。仲有日本經常飲到嘅可爾必斯梳打，正呀！