真心泰國菜館 (Closed)

今晚同朋友去食泰國菜。餐廳喺旺角朗晴坊2樓，正正就係喺朗豪坊戲院隔離，但係次次行過都冇留意到呢一個入口，好神秘。餐廳裝修別緻，非常有泰國風味。叫咗三個晚餐，價錢一啲都唔貴，而且仲有甜品嘢飲。叫咗一碟泰式蠔仔炒蛋配白飯，蠔仔多肉，配炒蛋送飯，非常開胃。朋友叫咗一碟先咖喱炒蝦意粉，非常特別嘅味道，好似有好多種蔬菜同香草味。特別問咗老闆娘，原來有一種材料係泰國嘅蕃茄，綠色一粒粒好似綠豆咁，對糖尿病同埋暗瘡都有治療嘅作用。最後叫咗一碟泰式冬陰炒公仔麵，辣辣地，公仔麵係香港人嘅至愛，冇得輸。朋友話去食泰國嘢一定要試佢哋嘅泰式凍奶茶，但係因為係晚餐我怕夜晚瞓唔着，所以我叫咗個椰汁紅豆冰。最後甜品係大菜糕，食返一啲童年嘅回憶。呢一間泰國餐館，地理位置確實唔係咁容易搵到，但係食得出佢哋係好用心經營，同埋好地道，值得捐窿捐罅去發掘一下。